رویداد خبري آژانس په افغانستان کې لومړنۍ دیجټلي خبري آژانس
د بنګلهدېش ګوښه شوې لومړۍ وزیرې شیخ حسینې له هند څخه خپل هېواد ته د بېرته ستنېدو په موخه د نوي پاسپورټ او ملي پېژندپاڼې د ترلاسه کولو غوښتنه کړې ده.
رویټرز خبري اژانس راپور ورکړی، چې د حسینې وکیلانو په نوي ډیلي کې د بنګلهدېش سفارت ته په یوه لیک کې د نوموړې لپاره د نویو سفري اسنادو د صادرولو غوښتنه کړې ده.
د راپور له مخې، دا له ۲۰۲۴ کال راهیسې بنګلهدېش ته د حسینې د بېرته ستنېدو لپاره لومړی رسمي اقدام دی. هغې تر دې مخکې ویلي وو، چې د ډسمبر په میاشت کې به خپل هېواد ته ستنه شي او محکمې ته به ځان وسپاري.
شیخ حسینه په ۲۰۲۴ کال کې د محصلانو په مشرۍ د پراخو لاریونونو له امله له واکه ګوښه شوه او هند ته وتښتېده. نوموړې تېر کال د لاریونونو د ځپلو په تړاو په غیاب کې په اعدام محکومه شوې، خو پر هغې لګېدلي تورونه ردوي.
رویټرز زیاتوي، چې د حسینې احتمالي بېرته ستنېدل ښايي په بنګلهدېش کې سیاسي او حقوقي کړکېچونه لا زیات کړي، خو په ورته وخت کې له هند سره د دغه هېواد د ترینګلو اړیکو د ښه کېدو لپاره هم زمینه برابرولای شي.
