رویداد خبري آژانس په افغانستان کې لومړنۍ دیجټلي خبري آژانس
ټاکل شوې چې نن دوشنبه د (وري په ۸مه) د پاکستان پارلمان يا قومي اسمبلۍ غړي، د دغه هېواد لومړي وزير عمران خان ته د باور او يا هم د نه باور رايه ورکړي.
د تحريک انصاف ګوند په مشرۍ د پاکستان اېتلافي حکومت د خپل مخالف سياسي اېتلاف له لوري تورن دی، چې د پاکستان کورنۍ او بهرنۍ پاليسي يې ناسمه روانه کړې او له همدې کبله پاکستان له سخت مالي کړکېچ سره مخ دی.
که څه هم عمران د پارلمان له لوري له مقدمې سره مخ دی، خو تر څنګ يې مخالفو سياسي ګوندونو دا ادعا هم کوي چې د تحريک انصاف په مشرۍ حکومت د دولت له امکاناتو په ګټنې سره د عمران خان په ګټه تبليغات کوي.
بل لورته د ملا فضلالرحمن په مشرۍ د جمعيت علماء اسلام ګوند له کووټې او پېښور او دغه راز د مسلم ليګ ن ګوند بيا له لاهور څخه اسلاماباد ته لاريونونه پيل کړي دي؛ خو د پاکستان کورنيو چارو وزير شېخ رشيد احمد بيا ويلي چې لاريونوالو ته به دا اجازه ور نه کړي، څو اسلاماباد ته دننه شي.
