رویداد خبري آژانس په افغانستان کې لومړنۍ دیجټلي خبري آژانس
په داسې حال کې چې پر اوکريان د روسي ځواکونو له بريد ۲۶ ورځې تېرېږي؛ خو د هرې ورځې په تېرېدو سره په دې هېواد کې د جګړې له تاو د تلونکو خلکو شمېر زياتېږي.
د راپورونو له مخې، تر دې مهاله څه باندې ۱۰ ميليونه اوکراينيانو د جګړې له امله خپلې مېنې پرېښي او پر ګاونډيو هېوادونو سربېره خوندي سيمو ته تللي دي.
اوکرايني ځواکونو ويلي، چې د پلازمېنه کيف اړوند سيمو کې لا هم له روسي ځواکونو سره جګړه دوام او په خبره يې هڅه کوي، چې د ښار شمال لوېديځ له لارې د روسي ځواکونو محاصره ماته کړي.
له دې سره د اوکراين ولسمشر ولاديمير زلينسکي بېګاه شپه د (وري په لومړۍ) ويلي، چې د ناټو په سازمان کې د اوکراين غړيتوب په اړه پر خپله کړې پرېکړه بيا له سره غور کوي؛ خو په خبره يې مشروط پر دې چې روسيه اوربند وکړي او خپل ځواکونه له اوکراين وباسي.
