رویداد خبري آژانس په افغانستان کې لومړنۍ دیجټلي خبري آژانس
د هرات د پوهنې ریاست چارواکي وایي چې په دغه ولایت کې د دانش سرا لومړني ښوونځي ته نوې ودانۍ جوړه او ګټې اخیستنې ته وسپارل شوه.
د هرات د پوهنې رییس ذکریا رحیمي د یاد ښوونځي د پرانیستې پرمهال وویل:” د پوهنې په پراختیا کې د خلکو ونډه خورا ګټوره او اغیزناکه ده، او باید ووایم چې دا ښوونځی د هرات ښار په شپږمه ناحیه کې د خلکو په مرسته جوړ شوی او په نږدې راتلونکي کې به څو نور ښوونځي هم پرانستل شي ، چې مالي لګښت یې د سیمې د خلکو لخوا ورکړل شوی.”
همدارنګه د هرات د ټولنیزو او کلتوري چارو مرستیالې مونسې حسن زاده د ښوونې او روزنې په برخه کې د خلکو له همکارۍ او ملاتړ څخه مننه وکړه او د بیارغونې او پراختیا په برخه کې يې د هرات ولایت د سیمه ییزې ادارې ترمینځ د همکاریو پر دوام ټینګار وکړ.
د هرات د پوهنې ریاست چارواکي وایي، چې د دانش سرا لومړنی ښوونځی په ۱۳۵۰ متر مربع متره ځمکه کې په پاخه او اساسي ډول د ۱۰ میلیونو افغانیو په مجموعي لګښت جوړ شوی، چې ۸ ټولګي او نورې اړینې ښوونیزې آسانتیاوې لري.
