رویداد خبري آژانس په افغانستان کې لومړنۍ دیجټلي خبري آژانس
پاکستان کې د افغان کډوالو نیولو، بندي کولو او جبري ایستلو تر ټولو سخت پړاو پیل شوی دی.
راپورونه ښيي امنیتي ادارو په اسلاماباد، کویټه، کراچۍ، پېښور او نورو ښارونو کې پراخ عملیات پیل کړي، چې پکې سلګونه افغان کډوال له قانوني اسنادو پرته یا د اسنادو د ارزونې تر نامه لاندې نیول شوي دي.
د عیني شاهدانو په وینا، پولیس حتی هغه کډوال هم نیسي چې د کډوالۍ اسناد لري، خو اسناد یې د تصدیق یا تمدید په مرحله کې دي.
ورته مهال، د پاکستان کورنیو چارو وزارت د اوس وخت لپاره د ویزو د تمدید بهیر بند کړی، زرګونه افغانان چې د بهرنیو هېوادونو په سفارتونو کې یې د کډوالۍ یا پناه غوښتنې پروسې روانې دي، له سختو ستونزو او اندېښنو سره مخ دي.
دوی نشي کولای خپل اسناد نوي کړي، او د پولیسو لهخوا د نیول کېدو یا ایستل کېدو له جدي ګواښ سره مخ دي.
