رویداد خبري آژانس په افغانستان کې لومړنۍ دیجټلي خبري آژانس
د ملګرو ملتونو پراختیايي پروګرام (UNDP) ویلي، چې په افغانستان کې د ښځو په نوم د ثبت شویو سوداګریزو جوازونو شمېر د تېرو پنځو کلونو په پرتله لس برابره زیات شوی او اوس له ۱۰ زرو څخه اوښتی دی. د دې ادارې د مالوماتو له مخې، د ۲۰۲۱ کال تر مخه د ښځو په نوم شاوخوا زر رسمي سوداګریز جوازونه ثبت شوي وو، خو اوس دغه شمېر د پام وړ لوړ شوی دی.
یادې ادارې همداراز ویلي، چې په افغانستان کې د شته ستونزو سربېره، کوچني کاروبارونه د ډېرو ښځو لپاره د عاید، اقتصادي خپلواکۍ او د کورنیو د ملاتړ یوه مهمه وسیله ګرځېدلې ده.
دغه اداره زیاتوي چې افغانې ښځې د لاسي صنایعو، کرنې، خوراکي توکو او نورو کوچنیو تولیدي برخو په ګډون، په بېلابېلو برخو کې په سوداګریزو فعالیتونو بوختې دي.
د ملګرو ملتونو پراختیايي پروګرام د مالوماتو له مخې، دې ادارې له ۲۰۲۱ کال راهیسې په افغانستان کې د ۹۰ زرو څخه د ډېرو کوچنیو، وړو او منځنیو سوداګریزو فعالیتونو ملاتړ کړی دی. UNDP ټینګار کوي چې د خصوصي سکټور پیاوړتیا او د ښځو اقتصادي ګډون د افغانستان د اقتصادي ودې لپاره مهم رول لري.
