رویداد خبري آژانس په افغانستان کې لومړنۍ دیجټلي خبري آژانس
د افغانستان لپاره د ايران ځانګړي استازي حسن کاظمي قمي خبر ورکړی، چې د افغانستان له لوري د کمال خان بند اوبه ور پرېښوول شوي او د ايران سيستان ولايت ته رسېدلي دي.
نوموړي په دې اړه خپل ټوېټر کې پرون شنبه د (زمري په ۱۵مه) د کمال خان بند د اوبو هغه وېډيو خپره کړې، چې پرون سيستان ولايت ته ورسېدلي دي.
قمي له دې وېډيو سره ليکلي، چې د افغانستان له لوري د اوبو ور خوشې کول د ډيپلوماټيک تعامل او د دواړو لورو ترمنځ د منظمې همغږۍ د موجوديت پايله ده.
په دې وروستيو کې د افغانستان سرپرست حکومت چارواکو ويلي و، چې د وروستيو متواترو اورښتونو په نتيجه کې د کمال خان بند د اوبو کاسه ډېره ډکه شوې ده.
له دې وړاندې د ايران بهرنيو چارو وزير حسين امير عبداللهيان د دې هېواد د پارلمان له غړو سره په يوه ناسته کې ويلي و، چې له ترکيې او افغانستان سره په اوبو کې حق لري او هېڅکله به له دې حق تېر نه شي.
