رویداد خبري آژانس په افغانستان کې لومړنۍ دیجټلي خبري آژانس
اسوشیټیډ پرېس خبري اژانس راپور ورکړی چې د امریکا پوځ ادعا کړې، چې د هرمز تنګي د بیا پرانیستلو په ترڅ کې یې له ایراني ځواکونو سره نښته کړې ده. د امریکايي چارواکو په وینا، په دې پېښه کې شپږ وړې کښتۍ ډوبې شوې او دوه امریکايي سوداګریزې بېړۍ وتوانېدې چې په بریالیتوب سره له تنګي تېرې شي. دا پرمختګ په داسې حال کې شوی چې هرمز تنګی د سیمهییزو کړکېچونو له امله تر سخت فشار لاندې دی.
بل لور ته، متحده عربي اماراتو ویلي چې د اوربند له ټینګښت وروسته د لومړي ځل لپاره د ایران له لوري تر برید لاندې راغلي دي.
د اماراتو د هوايي دفاع سیسټمونو د راپورونو له مخې، ۱۵ توغندي او څلور بېپیلوټه الوتکې شنډې شوې دي.
په ورته مهال، دغه هېواد دا بریدونه د سیمې د امنیت لپاره جدي ګواښ بللی دی.
سره له دې، که څه هم ایراني چارواکو تر اوسه په ښکاره ډول د دغو بریدونو مسوولیت نه دی منلی، خو د ایران د بهرنیو چارو وزیر خبرداری ورکړی چې امریکا او متحده عربي امارات باید له لا زیاتې ښکېلتیا ډډه وکړي. هرمز تنګی، چې د نړیوالې سوداګرۍ لپاره حیاتي ارزښت لري، د روان کړکېچ پر مهال د پوځي او سیاسي فشارونو په مرکز بدل شوی دی.
