رویداد خبري آژانس په افغانستان کې لومړنۍ دیجټلي خبري آژانس
د امریکا د دفاع وزارت ویلي چې له افغانستانه د ۲۰۲۱ کال د وتلو د ارزونې په لړ کې یې د لوړپوړو پوځي او ملکي چارواکو سره د مرکو مهم پړاو بشپړ کړی دی.
د دغه وزارت ویاند شان پرنیل ویلي چې دا ارزونه د ډونالډ ټرمپ په امر پیل شوې او هدف یې دا دی چې د وتلو بهیر په هر اړخیزه توګه وڅېړل شي. د هغه په خبره، په دې بهیر کې د امریکا د پوځ له مخکښو قومندانانو سره مرکې شوې او ترڅنګ یې میلیونونه اسناد هم ارزول شوي، څو یو دقیق او هر اړخیز انځور تر لاسه شي.
د ویاند په وینا، تمه کېږي چې دا ارزونه به د امریکا د معاصر پوځي تاریخ له تر ټولو جامع راپورونو څخه وي، چې پکې به د پرېکړو نیمګړتیاوې او تېروتنې په روښانه ډول په ګوته شي.
هغه ټینګار کړی چې د دې ارزونې اساسي هدف دا دی چې راتلونکې کې د ورته ناکامیو مخه ونیول شي او د پوځي عملیاتو د مدیریت لپاره اغېزمنې لارې چارې وموندل شي. دا بهیر وروسته له هغې لا جدي شو، چې د ۲۰۲۱ کال د اګست په ۲۶مه د کابل په هوايي ډګر کې خونړۍ چاودنه رامنځته شوه او لسګونه کسان پکې ووژل شول.
چارواکي وایي چې، د دې ارزونې پایلې به په راتلونکو میاشتو کې د امریکا د دفاع وزیر او ولسمشر ته وړاندې شي، څو پر بنسټ یې راتلونکې پرېکړې لا دقیقې او مسؤلانه وشي. د پنټاګون په باور، دا راپور به نه یوازې د افغانستان د وتلو په اړه پوښتنو ته ځواب ووایي، بلکې دا به هم روښانه کړي چې څنګه امریکا کولی شي په راتلونکو بحراني حالاتو کې له ورته غمیزو ځان وساتي.
