رویداد خبري آژانس په افغانستان کې لومړنۍ دیجټلي خبري آژانس
په داسې حال کې چې په ملګرو ملتونو کې د هند دايمي استازي د نوموړي سازمان د امنيت شورا وروستۍ ناستې پرمهال، د اوکراين په بوچا ښار کې د روسي ځواکونو له لوري د ملکي وګړو وژنه وغندله، اوس دې هېواد اعلان کړی چې له روسيې سره به سوداګري ثابته ساتي.
د هند بهرنيو چارو وزير اېس جيشنکر پرون چهارشنبه د (وري په ۱۷مه) د دې هېواد پارلمان ته په خبرو کې ويلي، په اوسمهال روسيه د سوداګرۍ په برخه کې د هند يو له پيچلو ملګرو دی او په خبره يې حکومت داسې هڅې کوي، چې پر بنسټ يې له دې هېواد سره د هند سوداګريزه راکړه په خپل عادي حالت کې وساتي.
د هند او روسيې ترمنځ سوداګري تر ډېره پر نظامي همکاريو ولاړه ده او په ملکي برخو کې د دواړو هېوادونو ترمنځ د سوداګرۍ ارزښت، په کلنۍ توګه ۹ مېليارد ډالر ده.
هند تل ټينګار کړی چې په اوکراين کې روان تاوتريخوالی دې د خبرو له لارې کم او پای ته ورسېږي. په دې وروستيو کې د اوکراين په بوچا ښار کې د ملکي وګړو د وژلو له امله، پر روسيې نېوکې او فشارونه زيات شوي دي؛ خو روسيې ويلي چې ځواکونو يې په ياده سيمه کې هېڅ ملکي وګړی نه دی په نښه کړی.
