رویداد خبري آژانس په افغانستان کې لومړنۍ دیجټلي خبري آژانس
د اېتوپيا حکومت او مخالفو ټيګري وسلهوالو ترمنځ د افرېقايي هېوادونو د ټولنې يا AU په منځګړيتوب په خبرو کې د بېساري پرمختګ په نتيجه کې، دواړه لوري پر اوربند سلا شوي دي.
فرانس پرېس اژانس په دې اړه خپاره کړي راپور کې د افرېقايي ټولنې په حواله د اوربند دا هوکړه نوی سباوون بللی او زياته کړې يې ده، چې له دې هوکړې سره به په اېتوپيا کې روانه دوه کلنه کورنۍ جګړه پای ته ورسېږي.
د راپور له مخې، په اوربند سره به مرستندوی بنسټونو د اېتوپيا په شمال کې ټيګري سيمې ته د مرستو رسولو لړۍ پيل کړي. دعلته د جګړې له امله ۹۰ سلنه خلکو مرستو ته اړتيا پيدا کړې ده.
د اوربند د هوکړې په اړه د ټيګري د خلکو ازادۍ جبهې يا TPLF او د اېتوپيا حکومت ګډه اعلاميه هم خپره کړې او په کې يې ويلي، چې دغه هېواد يوازې يو وسلهوال ځواک لري.
د اعلاميې له مخې، ټيګري وسلهوال به وسله تسليموي او د اېتوپيا په وسلهوالو ځواکونو کې به د منظم ميکانېزم له لارې ځای پر ځای کېږي.
د اېتوپيا لومړي وزير ابي احمد د اوربند په اړه دا هوکړه خورا مهمه بللې ده. د امريکا په شمول ډېرو هېوادونو د اوربند په اړه د دې هوکړې هرکلی کړی دی.
له دې وړاندې په تېر اګسټ کې هم دواړو لوريو پر اوربند هوکړه کړې وه، خو له دوو مياشتو وروسته اوربند بېرته مات شو.
