رویداد خبري آژانس په افغانستان کې لومړنۍ دیجټلي خبري آژانس
د افغانستان مشهور سندرغاړی فرهاد دریا، چې خپله هم په خټه پښتون دی، پر فیسبوک پاڼې ېې د پښتنو په نقدولو له توندو غبرګونونو سره مخ شوی.
نوموړي د دې لیکنې په یوه برخه کې لیکلي:« ځان مشر او د دې خاورې اصلي خاوند ګڼې، او هر هیوادوال دې چې ستا د فکر سره جوړ نه وي، د پردي او جاسوس ټاپه پری وهې. وطنداري او ورورګلوي خو په خدای که په دې کرکې او کینې وشي. ته چې ونشی کړی چې په افغانستان عاشق فرهاد دریا د خپل هیوادوال په توګه وزغمې، بیا نو څنګه کولی شی چې د بل هیوادوال سره دې د یووالي په شعار او ټولشموله افغانستان ته به ورسیږی؟»
لیکوال او ژورنالیست اجمل اند د نوموړي په غبرګون کې لیکلي:«هغه ( ټاپې ) چې نوموړې په مجموعي توګه د لسګونو ميلونو وګړو پر يو توکم لګولي، يو ولس ته څرګند سپکاوی دی. دا د ښاغلي دريا لومړی ځل هم نه دی بلکې تر دې مخکې يې هم په خپلو څرګندونو خپلو مينه والو کې د یو قوم یا توکم پر وړاندې کرکه هڅولې ده.»
ژباړن او ليکوال مير احمد ياد ښاغلي دريا ته په غبرګون کې ویلي:«تاسې یو ځل د جاوېد امیرخیل یا هارون باچا لایف کنسرټونه او هغوی سره د خلکو مینه وګورئ، باور لرم چې ذهن به مو یو څه بدل شي. البته د ډم، دلاق، سازنده… او نورې توهین آمزه… کلمې په هره ژبه کې د ځینو لوېدلو خلکو په قاموسونو کې وي، خو معنی دا نه ده چې دا قاموس ګني له همدې کلمو ډک دی او نور په کې څه نشته. »
ارشاد رغاند بيا فرهاد دریا خپله هم د يوه پښتون په توګه د پښتنو پر اوسني وضعيت پړ ګڼلی، خو ورسره شوي مخالفتونه ېې نقد کړي:«فرهاد دریا خپله هم د يوه پښتون په توګه د نقد کړي وضعيت په اړه مسوول او د نقد وړ دی، خو هغه ته له ورکړو ځوابونو ما داسې وګڼله لکه دريا چې تر ټولو غټ قاتل، د وطن دښمن او زموږ د ټولو بحرانونو مسوول وي.هیله ده خپل ټول غیرت او جذبات د يوه بې وسه هنرمن خلاف ونه کاروئ، نور خلک هم شته!»
فرهاد دریا د خلکو غبرګونونو ته ځواب نه دی ورکړی.
هغه په وروستيو کې څو ځله د منتقدینو له لوري ېې د ځينو پښتون ضدو کړيو څخه په اغېزمنیدو او پښتنو ته په بد نظر کولو تورن شوی، خو نوموړي داسې تورونه رد کړي دي.
