رویداد خبري آژانس په افغانستان کې لومړنۍ دیجټلي خبري آژانس
د کډوالو په چارو کې د ملګرو ملتونو عالي کميشنرۍ يا UNHCR خبر ورکړی، چې په کابل کې د بحرېن له سلطانتي بشري خېريه بنسټ سره يې د پکتيکا او خوست زلزله ځپلو کورنيو ته د مرستې رسولو په موخه يوه هوکړه لاسليک کړې ده.
دې کميشنرۍ په خپله اعلاميه کې ويلي، چې دغه هوکړه د يو ميليون ډالرو په ارزښت ده او له مخې يې به د پکتيکا ګيانو او برمل او دغه راز د خوست سپېرې ولسوالۍ کې له زلزله ځپلو کورنيو سره د حفاظتي خدمتونو، بېړنيو اړتياوو پوره کولو او د نورو اړينو مرستې رسولو به برخو کې د ملګرو ملتونو د کډوالو چارو عالي کميشنرۍ د هڅو ملاتړ کوي.
په کابل کې د يادې کميشنرۍ استازي ليونارد زولو د دغه تړون د لاسليک کولو پرمهال ويلي، چې دا مرستې به په پکتيکا او خوست کې اړمنو کورنيو ته په رڼه ډول ورسېږي.
له دې سره د بحرېن سلطنتي بشري بنسټ رئيس مصطفی السيد ويلي، چې دغه مالي مرسته په ټوله نړۍ کې د نوموړي بنسټ د هڅو په دوام ترسره کېږي او له دې کبله يې د ملګرو ملتونو د کډوالو عالي کمينشرۍ له لارې لګوي، چې دا اداره په هر ځای کې د اړتيا وړ مرستې په چټکۍ سره برابروي.
تېرې جون مياشتې په ۲۲مه سختې زلزلې د پکتيکا ګيان او برمل او د خوست سپېرې ولسوالۍ اړوند سيمې ولړوزلې. په دې ترڅ کې څه باندې زر تنه شهيدان او نږدې ۳زره تنه نور ټپيان شول.
