رویداد خبري آژانس په افغانستان کې لومړنۍ دیجټلي خبري آژانس
د پاکستان د ملي ډیموکراټیک ګوند مشر محسن داوړ د مریم نواز د څرګندونو په غبرګون کې ویلي، چې په خیبر پښتونخوا کې د ترهګرۍ، ناامنۍ او تاوتریخوالي پراختیا د پنجاب د ملکي او پوځي مشرانو او بهرنیو ګټو د سیاستونو پایله ده.
هغه زیاته کړې، د پنجاب مشران او بهرني ځواکونه د پښتنو د ځمکو او سرچینو د نیولو او د امریکا د ستراتېژیکو ګټو د خوندي کولو لپاره پښتانه ځوانان له زدهکړو لرې کړي او د ټوپک کلتور ته یې هڅولي دي.
داوړ همداراز ویلي، په داسې حال کې چې د پنجاب مشران اوس د ترهګرۍ له پراختیا اندېښنه څرګندوي، خو د نوموړي په وینا، همدوی داسې سیاستونه غوره کړي وو چې په خیبر پښتونخوا کې یې د تاوتریخوالي او ترهګرۍ د پراختیا زمینه برابره کړې ده.
هغه زیاته کړې، پښتانه له لسیزو راهیسې د دغه وضعیت له پایلو سره مخ دي.
دا په داسې حال کې ده چې، د پنجاب اعلی وزیرې مريم نواز، تر دې وړاندې ادعا کړې وه چې په پنجاب کې ډېری ترهګریزې پېښې او ناامنۍ له ګاونډي ایالت څخه طرحه او تنظیمېږي.
