رویداد خبري آژانس په افغانستان کې لومړنۍ دیجټلي خبري آژانس
د ایران د بهرنیو چارو وزیر وایي چې د متحده ایالاتو سره خبرو کولو ته چمتو دي، خو زیاتوي چې دا مذاکرات باید د «حد اکثر» فشار لاندې ونه شي.
عباس عراقچي پرون (شنبې، د سلواغې ۲۰مه) په یوې اعلامیې کې ویلي چې په ایران باندې د اقتصادي بندیزونو لرې کېدل مذاکراتو ته اړتیا لري او زیاتوي چې دا مذاکرات د «اعظمي فشار پالیسۍ» له مخې نه شي کيدای، ځکه د هغه په قول دا به خبرې اترې نه، بلکې د تسلیمېدو یوه بڼه وي.
د ایران دې تر ټولو لوړ پوړي دیپلومات دا څرګندونې داسې مهال کړي چې د متحده ایالاتو ولسمشر ډونالډ ټرمپ د روانې فبرورۍ میاشتې په څلورمې نېټې وویل چې پلان لري د ایران پر ضد د “حد اکثر فشار” پالیسي له سره غوره کړي.
ښاغلي ټرمپ په ایران باندې د اقتصادي بندیزونو د بیا لګولو په هدف د یو یاداښت لاسلیک کولو په مراسمو کې وویل چې دا کار د هغو شکونو له مخې کوي چې ایران کوښښ کوي اتومي وسلې جوړې کړي، خو تر څنګ یې دا هم وویل چې ښایي له دې پالیسۍ ډېر لږ کار واخیستل شي.
