رویداد خبري آژانس په افغانستان کې لومړنۍ دیجټلي خبري آژانس
د غزني روغتیایي مسوولان واېي، د دغه ولایت د مرکز اړوند شهباز او د اندړ ولسوالۍ اړوند ناني سیمه کې د کابل-کندهار پر لویه لاره د دوو جلا ټرافیکي پېښو له امله د ښځو او ماشومانو په ګډون ۵۲ تنه مړه شوي او ۸۵ تنه نور ټپیان دي.
د غزني د عامې روغتیا رییس زرک ځیرک وایې چې، تېره شپه(چهارشنبه،۲۸د لېندۍ) لومړۍ پېښه د یو ۵۸۰ ډوله مسافر وړونکي او ټانکر موټرو ترمنځ او دغه راز دویمه پېښه د ۴۸۰ ډوله مسافر وړونکي موټر او د یوه ټېلر د ټکر له امله رامنځته شوې ده.
د نوموړي د مالوماتو له مخې په دواړو ټرافیکي پېښو کې د ښځو او ماشومانو په ګډون ۵۲ کسان مړه شوي او ۸۵ نور ژوبل شوي دي.
له دې وړاندې هم دغه ولایت او د هېواد په نورو ولایتونو کې هم ورته پېښې شوي چې مسوولان یې، لامل د موټرچلوونکو بېاحتیاطي، د سړکونو خرابوالی او له ټرافیکي قوانینو د موټرچلوونکو نه خبرتیا په ګوته کړې.
