رویداد خبري آژانس په افغانستان کې لومړنۍ دیجټلي خبري آژانس
د جاپان یو لوړ قضایي مقام یوې نوې زېږدلې افغانې کډوالې ته د جاپاني تابعیت د ترلاسه کولو اجازه ورکړه.
د جاپان د کيودو خبري اژانس (شنبې، د وږي ۲۴مه) په يوه راپور کې ليکلي، چې دا غوښتنه په لومړي سر کې د يوې کورنۍ محکمې له خوا رد شوې وه، خو وروسته له هغه چې د ماشومې کورني وکيل د بیاکتنې غوښتنه وکړه، د ناګويا سترې محکمې يو نوی حکم صادر کړ او دې ماشوم ته یې د تابعیت په ورکولو موافقه وکړه.
د دې جاپاني رسنۍ د راپور له مخې، د افغان کډوالې د کورنۍ وکیل دا پرېکړه یو «ستر پرمختګ» بللی دی.
وکیل زیاته کړې چې ښايي دا پرېکړه په جاپان کې د افغان مور او پلار د ماشوم لپاره لومړۍ پرېکړه وي، چې په جاپان کې د کورنۍ د نوي ثبتولو اجازه ورکول کېږي.
د جاپان د تابعیت د قانون له مخې، هغه ماشوم چې په دې هېواد کې زیږیدلی وي او مور او پلار یې معلوم نه وي یا که دوی دواړه بې هېواد وپېژندل شي، د جاپان تبعه ګڼل کېږي.
«قاضي یاسوهیرو هاسګاوا» خپله پریکړه څرګنده کړه: “د ماشومې مور او پلار په ۲۰۲۲ کال کې د هغې د زیږون پر مهال بې وطنه وو، ځکه چې افغانستان په 2021 کې د سیاسي بدلونونو وروسته خپل نړیوال حیثیت له لاسه ورکړ.”
د جاپان د کډوالو د خدمتونو د ادارې د راپور له مخې، په ۲۰۲۱ کال کې په دغه هېواد کې یوازې له جنګ ځپلي افغانستان نه ۹ کسانو د کډوالۍ سند ترلاسه کړی و، خو دا شمېر په ۲۰۲۲ کال کې ۱۴۷ کسانو او په ۲۰۲۳ کال کې ۲۳۷ کسانو ته لوړ شوی دی.
