رویداد خبري آژانس په افغانستان کې لومړنۍ دیجټلي خبري آژانس
امريکا د ايران هغه هوايي بريد غندلی، چې پرون چهارشنبه د (تلې په ۶مه) يې د عراق په خاوره کې دننه پر کرد ميشته سيمه کړی دی.
د امريکا بهرنيو چارو وزارت وياند نېډ پرايس په دې اړه ويلي، چې د ايراني ځواکونو پروني هوايي بريد کې ملکي وګړي وژل شوي او زياته کړې يې ده، چې دا بريد په حقيقت کې د عراق د ملي حاکميت د نقض په مانا دی.
نوموړي پرون په واشنګټن کې خبريالانو ته ويلي، چې امريکا د دې بريد د غندلو او مخنيوي په برخه کې د عراق له خلکو او دولت سره اوږه په اوږ ولاړه ده.
په يوه جلا اعلاميه کې چې د امريکا بهرنيو چارو وزارت خپره کړې، بيا د ایران په کرد ميشتو سيمو کې د کردانو اعتراض کوونکو د ځپلو موضوع ته اشاره شوې.
په اعلاميه کې راغلي، چې د ايران په کرد ميشتو سيمو کې په زور د لاريونوالو ځپل ناوړه پايلي لري او په کې پر ايران غږ شوی، چې له دا ډول کړنو لاس واخلي.
ايراني ځواکونو پرون د عراق په قلمرو کې د کرد مخالف ګوند اهداف بمبار کړي دي. په دې بمبار کې د رسمي شمېرو له مخې ۹تنه وژل شوي او ۲۲ نور ټپيان دي.
خو د کردستان د بشري حقونو د څار سازمان ههنګاو بيا ادعا کړې، چې د ايراني ځواکونو له لوري په ترسره شوي دې هوايي بريد کې لږ تر لږه ۱۲تنه وژل شوي او ۴۰ نور ټپيان دي.
د دې بريد په اړه نړيوال غبرګونونه اوس هم دوام لري. جرمني، برېتانيې او فرانسې دغه بريد غندلی او پر ايران يې غږ کړی چې له ورته اقداماتو لاس په سر شي.
