رویداد خبري آژانس په افغانستان کې لومړنۍ دیجټلي خبري آژانس
د ننګرهار ولايت د رسنیو دفتر څخه په خپره کړې اعلامیه کې راغلي، د دې ولایت مرستيال پوهنوال ببرک مياخېل د پاکستان قونسلګرۍ مخې ته ۱۶ تنه جعلي تذکره لرونکي او دوه تنه دوکانداران، چې مراجعينو ته يې جعلي تذکرې جوړې کړې وې ونيول.
د ننګرهار مرستيال وايي، چې د ګڼې ګوڼې مخنيوي او نظم په موخه يې د ويزې لګولو په موخه ځانګړی مهالوېش جوړ کړی، چې له مخې يې چارې تر پخوا ډېرې منظمې شوي او خلک ترې راضي دي؛ خو متاسفانه چې يو شمېر کسان د بې نظمۍ هڅه کوي.
خبرپاڼه زیاتوي، نن د مهالوېش له مخې د کامې ولسوالۍ نوبت و، چې شپاړلس تنه يې په داسې حال کې ونيول چې په جعلي تذکرو سره يې هڅه کوله ويزه ترلاسه کړي همدا راز دوه هټيوال هم نيول شوي چې جعلي تذکرې يې جوړولې دوکانونه يې وتړل شول او نيول شويو کسانو سره به د قانون له مخې چلند تر سره شي.
