رویداد خبري آژانس په افغانستان کې لومړنۍ دیجټلي خبري آژانس
د سعودي عربستان ولیعهد محمد بن سلمان (دوشنبې، د لړم ۲۱مه) له اسراییلو وغوښتل چې د ایران ملي حاکمیت ته درناوی وکړي او په خاوره یې له برید کولو څخه ډډه وکړي.
شهزاده محمد بن سلمان په پایتخت ریاض کې د عرب لیګ او اسلامي همکارۍ سازمان ګډې سرمشریزې ته وویل چې نړیواله ټولنه باید اسراییل اړ کړي چې “ د ایران د اسلامي جمهوریت ملي حاکمیت ته درناوی وکړي او د ځمکنۍ بشپړتیا څخه یې سرغړونه ونه کړي.”
سعودي عربستان او ایران د تېر کال د اکتوبر په اوومه په جنوبي اسراییلو باندې د حماس له برید وروسته، په غزه کې د جګړې د مخنیوي لپاره د هڅو د یوې برخې په توګه په لوړه کچه اړیکې ساتلې دي.
دا اړیکې د دې لامل شوې چې په غزه کې د جګړې له پیل پنځه ورځې وروسته شهزاده محمد بن سلمان او د ایران د هغه وخت ولسمشر ابراهیم رئیسي په لومړي ځل تلیفوني خبرې وکړي.
دا په داسې حال کې ده چې د اکتوبر په میاشت کې سعودي عربستان اعلان وکړ چې په عمان سمندرګی کې له ایران او څو نوروهېوادونو سره پوځي تمرینونه کوي.
