رویداد خبري آژانس په افغانستان کې لومړنۍ دیجټلي خبري آژانس
د حزب الله یوې جګپوړې سرچینې د شنبې په ورځ د تلې په ۱۴ مه اعلان کړی، چې د حزب الله د وژل شوي مشر سید حسن نصرالله له احتمالي ځایناستي هاشم صفی الدین سره د جمعې له ورځې راهیسې د اسراییلو د هوايي برید له امله اړیکه پرې شوې ده.
د امریکا غږ د راپور له مخې، دا برید چې ویل کېږي د بیروت په جنوب کې د ځمکې لاندې پټنځای کې هاشم صفی الدین په نښه شوی و، د حزب الله په وړاندې د اسراییلو د پراخو عملیاتو د یوې برخې په توګه ترسره شوی.
د لبنان امنيتي سرچينو هم تاييد کړې، چې د بيروت په جنوبي څنډه کې د حومه او ضاحیه په سيمه کې د اسراييلو هوايي بريد د مرستندويه ځواکونو د رسېدو مخه نيولې ده.
د حزب الله دغه چارواکو د فرانسې خبري اژانس ته ویلي: «له سید صفی الدین سره د بیروت په جنوبي څنډو کې له خونړیو بریدونو وروسته اړیکه پرې شوې ده.»
خو د فرانسې خبري اژانس د راپور په غبرګون کې حزب الله په یوه بیان کې اعلان کړی چې په دې اړه یې کوم رسمي نظر نه دی خپور کړی.
