رویداد خبري آژانس په افغانستان کې لومړنۍ دیجټلي خبري آژانس
د افغانستان د بهرنيو چارو وزارت خبر ورکړی، چې د بهرنيو چارو او اطلاعاتو او فرهنګ سرپرست وزيرانو پرون جمعه د (غويي په ۹مه) د قطر د کورنۍ او ټولنيزو چارو پرمختګ له وزيرې مريم المسند ليدلي دي.
د دې وزارت وياند عبدالقهار بلخي په خپل ټوېټر کې په دې اړه لېکلي، افغان پلاوي د المسند د کار ساحه او مسووليت دروند وباله او نوموړې ته يې بلنه ورکړه چې د ميرمنو، يتيمانو او معلوليت لرونکو کسانو د وضعيت ارزونې او په دې برخه کې د قطر خيريه بنسټونو له لارې ماشومانو، ميرمنو او نورو اړینو برخو کې د خدماتونو وړاندې کولو په موخه افغانستان ته سفر وکړي.
بلخي زياته کړې، د دې لېدنې په پای کې پرېکړه شوې چې افغانستان ته دې د قطر يو پلاوی سفر وکړي، څو په خبره يې دغه پلاوی وکولی شي په دې هېواد کې د خپلو خيريه بنسټونو د دفترونو په پرانېستلو سره، بېوزله افغانانو ته د مرستو رسولو لار هواره شي.
د افغانستان سرپرست حکومت دغه پلاوی تېره اوونۍ د يو شمېر هوايي ډګرونو د تخنيکي مديرت د قرارداد پر سر د بحث په موخه قطر ته تللی؛ خو تر اوسه په دې برخه کې له ياد لوري سره مطلوبې پايلې ته نه دی رسېدلی.
