رویداد خبري آژانس په افغانستان کې لومړنۍ دیجټلي خبري آژانس
د اوبو او برېښنا وزارت تائيد کړه، چې ايران ته يې د کمال خان بند اوبه ور خوشې کړي او د دې هېواد سيستان بلوچستان ته رسېدلي دي.
د نوموړي وزارت سرپرست عبدالطيف منصور په دې اړه خپره کړې اعلاميه کې ويلي، چې دا کار يې د اوبو د تنظيم د قانون په چوکاټ کې، د نېمروز د خلکو په غوښتنه کړی دی.
دغه اعلاميه چې پرون يکشنبه د (زمري په ۱۶مه) خپره شوې په کې د منصوف له قوله ويل شوي، چې د اوبو د تنظيم قانون په چوکاټ کې د اوبو او برېښنا وزارت اړ دی، څو د اوبيزو سرچينو د تنظيم، د خلکو د اړتيا پوره کولو او د دوی هوساينې په موخه لازم ګامونه پورته کړي.
نوموړي ډاډ ورکړی، چې ايران ته به د هلمند سيند د اوبو په اړه په ۱۳۵۱ لمريز کال کې د شوې هوکړې پر بنسټ اوبه ورکړل شي او له دې پرته به د نوموړي په خبره يو څاڅکی اوبه هم ضايع نه شي.
ايران تېرو شلو کلونو کې د هلمند سيند د اوبو په اړه نوموړي تړون ته پابند نه دی پاتې شوی او تل يې له خپل حق زياتې اوبه ترلاسه کړي دي.
