رویداد خبري آژانس په افغانستان کې لومړنۍ دیجټلي خبري آژانس
د جرمني نهه کسیز طبي ټیم د دوه اوونیز ماموریت په ترڅ کې د بامیان په ولایتي روغتون کې شاوخوا ۲۰۰ ناروغان ارزوي، چې له ډلې به یې تر ۱۵۰ کسانو پورې د تخصصي جراحي عملیاتو لپاره وټاکل شي.
د ا.ا د عامې روغتیا وزارت وايي، دغه ټیم د یاد وزارت په همغږۍ او د آغاخان د روغتیايي خدمتونو مؤسسې په همکارۍ فعالیت کوي او ناروغانو ته به وړیا تشخیصي او جراحي خدمتونه وړاندې کړي.
د وزارت د معلوماتو له مخې، په دې درملنیزو خدمتونو کې پلاستیکي جراحي، د سوځېدلو غړو درملنه، د مورزادي نیمګړتیاوو اصلاح، د جګړو له امله د رامنځته شویو ټپونو درملنه او د پېچلو ناروغیو درملنه شامله ده.
همداراز، جرمني ډاکټران به افغان ډاکټرانو، جراحانو او د طب محصلانو ته نظري او عملي روزنه هم ورکړي.
د عامې روغتیا وزارت زیاتوي، چې د دغه ماموریت ټول لګښتونه د رضاکارو ډاکټرانو او همکارو بنسټونو له لوري ورکول کېږي او اړین درمل او طبي تجهیزات هم له ځان سره افغانستان ته راوړل شوي دي.
فتانه کمال
