رویداد خبري آژانس په افغانستان کې لومړنۍ دیجټلي خبري آژانس
نن د اکټوبر ۳۱مه د ښارونو نړیواله ورځ ده؛ هغه ورځ چې د ښاري ژوند د ستونزو، د ښارونو د راتلونکې او دوامدارې پراختیا په اړه د نړیوال پوهاوي لوړولو په موخه نمانځل کېږي.
ملګري ملتونه وایي، د دې ورځې نمانځل هېوادونو ته فرصت برابروي چې د ښاري پراختیا په برخه کې خپلې تجربې شریکې او د ښارونو د اوسېدونکو د ژوند د ښهوالي لپاره ګډې هڅې پیاوړې کړي.
سږ کال دغه ورځ د «ښارونو بیارغونه؛ د ټولو لپاره مناسب کورونه» تر شعار لاندې د چین په فوژو ښار کې نمانځل کېږي.
ملګري ملتونه ټینګار کوي چې د ارزانه او مناسبو کورونو برابرول، د زړو ښاري سیمو بیارغونه او د اوبو، روغتیا، ترانسپورټ او نورو بنسټیزو خدمتونو پراختیا د ښاري ژوند د کیفیت په لوړولو کې مهم رول لري.
دغه سازمان همداراز د اقلیمي بدلونونو پر وړاندې د ښارونو د مقاومت پیاوړتیا د خوندي، هوسا او دوامدارو ښارونو د جوړولو لپاره اړینه بولي.
