رویداد خبري آژانس په افغانستان کې لومړنۍ دیجټلي خبري آژانس
د ا.ا د بهرنیو چارو وزارت د هغو راپورونو په اړه اندېښنه څرګنده کړې، چې له مخې یې امریکا غواړي یو شمېر افغان کډوال پاکستان ته ولېږدوي.
د دغه وزارت ویاند په یوه اعلامیه کې ویلي، د راپورونو له مخې، امریکا غواړي هغه افغان کډوال پاکستان ته ولېږدوي، چې تر اوسه یې په دغه هېواد کې د قانوني اقامت اسناد نه دي ترلاسه کړي.
په اعلامیه کې راغلي، چې د ا.ا د خپلو ټولو اتباعو د حقونو او خوندیتوب مسوولیت لري او د هغوی د انساني کرامت، اصولو او نړیوالو منل شویو حقونو درناوی اړین بولي.
د بهرنیو چارو وزارت له امریکا غوښتي، چې د افغان کډوالو په اړه هر ډول پرېکړې په مسوولانه او سنجول شوې توګه وکړي، له اړوندو افغانانو سره مشوره وکړي او د هغوی د حقونو او ګټو د خوندي کولو لپاره لازم اقدامات ترسره کړي.
اعلامیه زیاتوي، چې د افغان کډوالو په اړه هر ډول پرېکړې باید د انساني کرامت، حقونو او بشري معیارونو په پام کې نیولو سره وشي.
ا.ا په پای کې د کډوالو د ستونزو د حل لپاره د خبرو اترو او دوهاړخیزې همکارۍ پر اړتیا ټینګار کړی دی.
