رویداد خبري آژانس په افغانستان کې لومړنۍ دیجټلي خبري آژانس
د افغانستان د بشري حقونو خپلواک کمیسیون وایي چې په هېواد کې یوازې په تېرو شپږو ورځو کې د جګړو له امله ۱۰۶ ملکي وګړو ته مرګ ژوبله اوښتې ده.
د دغه کمېسیون پرون یکشنبې په ورځ (د کب ۲۴مه نېټه) د یوې اعلامیې په خپرولو سره ویلي، تېرو شپږو ورځو کې د هېواد په بېلابېلو ولایتونو کې د جګړو له امله ۱۳ ملکي وګړي وژل شوي او ۹۳ نور ټپیان شوي دي.
دغه کمېسیون د جګړې له ښکېلو لوریو غوښتنه کړې ده چې باید د ملکي وګړو ژوند ته جدي پاملرنه وکړي.
د بشري حقونو خپلواک کمیسیون دغه راز د بشري حقونو پر نړیوالو بنسټونو غږ کړی دی چې باید د جګړې پر ښکېلو غاړو فشار راوړي څو په هېواد کې د روانې خونړۍ جګړې د ختمولو لپاره هر څه ژر تلپاتې اوربند ته غاړه کېږدي.
