رویداد خبري آژانس په افغانستان کې لومړنۍ دیجټلي خبري آژانس
د ښځو په چارو کې د افغانستان لپاره د امريکا ځانګړې استازې رينا اميري وايي، چې د طالبانو له لوري له ښوونځيو څخه د نجونو د منعه کولو ۴سوه ورځې پوره شوې او زياتوي، پر دې سربېره داسې هڅې هم شوي چې په پوهنتونو کې هم د نجونو زدهکړې له خنډ سره مخ شي.
رينا اميري نن سېشنبه د (لړم په ۳مه) په دې اړه خپل ټوېټر کې ليکلي، داسې کره راپورونه شته چې طالبانو؛ نجونې او په ځانګړې توګه هزاره نجونې د کابل پوهنتون له ليليې څخه بهر کړي او ان دا چې د نوموړې په خبره د پوهنتون دننه په ازمويينو کې هم برخه نه ده ورکړل شوې.
رينا اميري ټينګار کړی، طالبان نه شي کولی د افغانستان د ټولنې نيمايي برخې چې ښځې دي، د زدهکړو او کار له حق څخه انکار وکړي. د هغې په خبره، د نجونو زدهکړې او کار کولی شي چې افغانستان له اقتصادي اړخه پر ځای بسيه کړي.
نوموړې زياته کړې، د ښځو او نجونو په ګډون د ټولو افغانانو لپاره د زدهکړو برابرې زمينې برابرول کولی شي، چې افغانستان له بېوزلۍ بهر او هيلهمندۍ بيا زياتې کړي.
که څه هم د افغانستان سرپرست حکومت ويلي چې د نجونو د زدهکړو او د ښځو د کار په اړه يې پر يوه طرحه کار روان کړی، خو لا هم په دې برخه کې هېڅ پرمختګ نه دی شوی.
