رویداد خبري آژانس په افغانستان کې لومړنۍ دیجټلي خبري آژانس
پخواني ولسمشر حامد کرزي نن دوشنبه د (غبرګولي په ۲مه) له يو شمېر ښځينه فعالانو سره ليدلي او د يادې ليدنې پرمهال د ښځو د کار او زدهکړو پر بهير خبرې شوي دي.
د يادې د ليدنې پرمهال ښځينه فعالانو د ميرمنو د کار حق پر خونديتوب او دغه راز د نجونو پر مخ د ښوونځيو پر بيا پرانيستو ټينګار کړی دی.
په ورته وخت کې پخواني ولسمشر حامد کرزي هم د ميرمنو د کار او زدهکړو حق ته په اشارې سره ويلي، چې له ملي مشارکت او د ښځو له ونډې پرته په افغانستان کې پرمختګ ناشونی دی.
نوموړي زياته کړې، چې له لوږې او بېوزلۍ څخه د افغانستان د ژغورلو او د پرمختګ يوازېنۍ لار د زدهکړې او له نارينهوو سره اوږه په اوږه ښځو ته د کار کولو حق ورکول ډېر حياتي دی.
پخواني ولسمشر کرزي يو وار بيا د نجونو پرمخ له شپږم ټولګي څخه د پورته ښوونځيو پر پرانيستو ټينګار کړی او زياته کړې يې ده چې ژر دې په دې برخه کې معقوله پرېکړه وشي.
