رویداد خبري آژانس په افغانستان کې لومړنۍ دیجټلي خبري آژانس
د افغانستان لپاره د ملګرو ملتونو ځانګړې استازې روزا اوتونبایوا وايي، دغه سازمان د روان کال په جون میاشت کې د دوحې د درېیمې غونډې لپاره چمتووالی نیسي.
نوموړي د افغانستان په اړه د ملګرو ملتونو د امنیت شورا له غونډې وروسته په یوه خبري غونډه کې ویلي چې دغه سازمان غواړي هر کال په دوحه کې له یوې نه زیاتې غونډې وکړي.
د دوحې په دویمه غونډه کې چې د روان کال د فبرورۍ په ۱۸مه او ۱۹مه نېټه جوړه شوې وه، ا.ا له دې امله ګډون ونه کړ چې شرطونه یې ونه منل شول.
د اوتونبایوا په وینا، د ملګرو ملتونو د امنیت شورا په غونډه کې چې د افغانستان لپاره د دغه سازمان د نوي استازي د ټاکلو او د یوناما د ماموریت د غځولو په اړه جوړه شوې وه، روسیې او چین ویلي چې د ا.ا د تایید په صورت دوی به د دغه سازمان د نوي استازي له ټاکلو سره موافقه وکړي.
خو افغان چارواکي وايي، په افغانستان کې د یوناما په شتون کې د ملګرو ملتونو له لوري د نوي استازي د معرفي کولو اړتیا نشته.
د يادونې وړ ده، چې د ملګرو ملتونو د امنيت شورا په غونډه کې چې د چهارشنبې په ورځ جوړه شوې وه، يو شمېر ګډونوالو د افغان ښځو او نجونو د حقونو په ځانګړي ډول د زده کړې او کار د حق پر تامين ټينګار کړی دی.
