رویداد خبري آژانس په افغانستان کې لومړنۍ دیجټلي خبري آژانس
په ولسي جرګې یوشمېر وکیلان وایي په هېواد کې د جګړو له شدت سره هممهاله د ملي شتمنیو او سترو پروژو د تخریب هڅې روانې دي.
دافغانستان د ولسي جرګې غړي وایي په دې وروستیو کې په منظمه او سیستماتیکه توګه په هېواد کې د ملي شتمنیو او هغو تاسیساتو د ورانولو لپاره کار کېږي چې په عامو افغانانو پورې اړه لري او ددې هېواد له اقتصادي ودې سره مرسته کوي.
د ولسي جرګې غړی عبدالقادر قلاتوال وایي، بهرنۍ استخباراتي کړۍ له وسله والو په ملاتړ هڅه کوي په افغانستان کې د سولې پروسه سبوتاژ کړي او تر څنګ یې هغه تاسیسات او عامه پروژې تخریب کړي چې د زرګونه افغانانو ژوند ورپورې تړلی دی.
نوموړي له یوې رسنۍ سره په مرکه کې ویلي، چې د سړکونو ویجاړول، د برېښنا بندونو ته خطرونه جوړول، ښوونځي په بمونو الوځول او د برېښنا پر سب سټيشنونو بریدونه کول د هغه شوم پلان برخې دي چې د افغانستان د پرمختګ دښمنانو طرحه کړي دي.
نوموړی پر دې ورانکاره فعالیتونو د نړیوالې ټولنې چوپتیا هم غندي او په خبره یې افغان حکومت دې له نړیوالې ټولنې سره په ګډه ددغه ډول خطرناکو پلانونو د عملي کېدو مخنیوی وکړي
