رویداد خبري آژانس په افغانستان کې لومړنۍ دیجټلي خبري آژانس
ولسي جرګې د کابل ښاروال داود سلطانزوی یې څارنوالۍ ته ورمعرفي او لاسلیک یې بې اعتباره اعلان کړی.
ولسي جرګې لویې څارنوالۍ ته د کابل د ښاروال د معرفي کولو پرېکړه کړې ده.
د افغانستان د ولسي جرګې غړو نن چهارشنبه دسمبر ۳۰ ( مرغومي۱۰) په نننۍ غونډه کې پرېکړه کړې چې د کابل ښاروال داوود سلطانزوی باید څارنوالۍ ته ورمعرفي کړل شي او تر څنګ یې د هغه لاسلیک هم بې اعتباره اعلان کړی دی.
د وکیلانو په خبره نوموړي په کابل ښاروالۍ کې غیر قانوني ګومارنې کړې دي، له صلاحیتونو یې ناوړه ګټه پورته کړې ده او د ولسي جرګې له پرله پسې غوښتنو سره استجوابیه غونډې ته هم نه دی حاضر شوی.
تر دې وړاندې هم په رسنیو کې د کابل ښاروال په ادرس ډول ډول راپورونه خپاره شوي دي او د هغه په امر له غیر قانوني ګومارنو یادونه شوې ده.
د کابل ښاروال د ولسي جرګې د تازه پرېکړې په اړه تر دې دمه غبرګون نه دی ښودلی.
