رویداد خبري آژانس په افغانستان کې لومړنۍ دیجټلي خبري آژانس
په هرات ولایت کې پر یوه مسافر وړونکي موټر د ماین د چاودنې له کبله درې ملکي کسان وژل شوي او څلور نور ټپيان دي.
د هرات د امنیه قومندانۍ ویاند عبدالاحد ولي زاده ویلي دا چاودنه د یوه چسپکي ماین له کبله چې په یوه مسافر وړونکي فلانکوچ ډوله موټر کې ایښودل شوی وو، رامنځ ته شوې ده. هغه وویل پيښه د هرات په حاجي عباس سیمه کې شوېډه.
که څه هم ښاغلی ولي زاده په پیښه کې د وژل شوي کسانو شمیر دوه او د ټپیانو شمیر شپږ تنه ښيي ، خو د هرات روغتیایي مسؤلین وايي چې د پيښې له سیمې د هرات حوزوي روغتون ته درې مړي او څلور ټپیان وړل شوي دي.
د هرات د عامې روغتیا ویاند محمد رفیق شیرزي پرون ماښام یوې رسنۍ ته وویل چې د دریو کسانو روغتیايي وضعیت د اندیښنې وړ دی.
تر اوسه دا روښانه نده چې ماین د چالخوا په مسافر وړونکي موټر کې ایښودل شوی وو، خو افغان چارواکي تل په دې ډول پيښو کې د دولت د مخالفو وسله والو په ځانګړي ډول د طالبانو لاس ښکیل بولي.
دا چاودنه په داسې حال کې کیږي چې یوازې څو ساعته د افغان حکومت او طالبانو ترمنځ د لوی اختر په مناسبت څلور ورځني اوربند ته پاتې دي.
