رویداد خبري آژانس په افغانستان کې لومړنۍ دیجټلي خبري آژانس
د افغانستان د ملي دفاع وزارت وايي، د نیمروز د خاشرود ولسوالۍ د وروستۍ پېښې د څېړلو لپاره یو حکومتي پلاوی دغه ولایت ته تللی دی.
ادعا شوې، چې په خاشرود ولسوالۍ کې د افغان ځواکونو په یوه هوایې برید کې لږ تر لږه ۱۴ ملکي وګړي وژل شوي دي چې ویل کېږي قربانیان د یوې کورنۍ غړي دي.
د قربانیانو کورنیو پرون ویلي وو، چې د پېښې د ارزونې لپاره ټاکل شوی پلاوی لا تر اوسه سیمې ته نه دی تللی.
د افغانستان دفاع وزارت نن په یوې خبرپاڼې کې لیکلي، چې د ولسمشر په سپارښتنه د دغه وزارت د کشف او استخباراتو د مشر برید جنرال عبدالقیوم سالارزي په مشرۍ پلاوی ټاکل شوی او نیمروز ولایت ته تللی دی.
