رویداد خبري آژانس په افغانستان کې لومړنۍ دیجټلي خبري آژانس
د افغانستان د بهرنیو چارو وزارت وايي، د سولې مذاکرو د دوهم پړاو د بریا لپاره یې ډیپلوماټیکې هڅې پیل کړي دي.
د یاد وزارت ویاند ګران هېواد نن شنبه د جنورۍ۹ (مرغومي ۲۰مه) رسنیو ته په یوه لېږلي ویډیويي پیغام کې وویل، د بهرنیو چارو وزیر محمد حنیف اتمر په دې لړ کې د ګڼو هېوادونو له مشرانو سره بحث وکړ.
ګران هېواد وايي: “د بهرنیو چارو وزیر په دې لړ کې په تېرو دوو ورځو کې د بېلابېلو هېوادونو له شپږو بهرنیو چارو وزیرانو، د ملګرو ملتونو او امریکا له ځانګړو استازو سره خبرې وکړې او هڅه یې وکړه د دې بهیر د بریا لپاره د دوی ملاتړ له ځان سره ولري.”
د افغان حکومت د سولې مذاکراتي پلاوي تېره سې شنبه قطر ته روان شو او د طالبانو له مذاکراتي پلاوي سره به د اصلي مذاکرو پر اجنډا نن شنبه خبرې پیلوي.
د حکومت پلاوی ټینګار کوي چې د خبرو د اجنډا په سر کې به دا وار د اوربند موضوع شامله وي.
