رویداد خبري آژانس په افغانستان کې لومړنۍ دیجټلي خبري آژانس
د فاریاب امنیتي چارواکي وايي، په دغه ولایت کې د افغان ځواکونو په هوايي بریدونو کې ۸ وسله وال طالبان وژل شوي دي.
۲۰۹ شاهین قول اردو ویلي، افغان ځواکونو دغه هوايي بریدونه پرون سې شنبه د جنورۍ ۱۲ ( مرغومي۲۳) مازیګر په المار ولسوالۍ کې د طالبانو پر یوه پوسته کړې دي.
د دې قول اردو ویاند محمد حنیف رضايي په دې اړه رسنیو ته وویل: “په دې حمله کې ۸ تروریست طالبان وژل شوي، د دوی یو چک پاینټ یا یو کور یې چې د سړک پرغاړه و، له منځه وړل شوی او په دې هوايي حمله کې یې درې موټرسایکلونه هم په بشپړ ډول سوځول شوي دي.”
د فاریاب المار ولسوالۍ له ناامنو ولسوالیو ګڼل کېږي، چې وخت ناوخت ترې د طالبانو د فعالیت راپورونه ورکول کېږي.
په قطر کې د سولې له هڅو سره- سره په افغانستان کې د جګړې ښکېل لوري یوه او بل ته د درنې مرګ ژوبلې اړولو ادعاوې کوي.
