رویداد خبري آژانس په افغانستان کې لومړنۍ دیجټلي خبري آژانس
د ننګرهار ولایت د کرنې، اوبولګولو او مالدارۍ ریاست چارواکي وایي، چې په دې ولایت کې د رومي بانجانو کروندې او تولیدات زیاتې شوي دي او کال تربلې رومي بانجانو او سبو کرکېلي ته د کروندګرو لېوالتیا زیاتیږي.
د ننګرهار د کرنې ریاست چارواکي وایي، چې په دغه ولایت کې د رومي بانجانو او نورو سبو د کرکېلي د پراختیا او تولید زیاتوالي لپاره هڅې روان کړې چې دا هڅې لامل شوې، چې سږکال په دغه ولایت کې د رومي بانجانو تولیدات زیات شي.
د کرنې وزارت د ۱۳۹۸ یم کال د احصایې ریاست مالومات ښیي، چې تېرکال د دې ولایت په ۱۱۰۷ هکټاره ځمکه رومي بانجان کرل شوي وو چې د تولید کچه یې تر ۲۷ زره او ۶۷۵ مټریک ټنو ته ورسېد.
خو سږکال ددې ولایت د رومي بانجانو کروندې او تولیدات د تېرکال په پرتله زیاتي دي.
یاد ریاست زیاتوي، چې د ننګرهار کې د شنوخونو په بڼه هم د رومي بانجانو او یوشمېر نورو سبو او ترکاریو کرکېله کیږي او په پراخه کچه پېرېدونکي او مشتریان لري.
د کرنې ریاست همدارنګه زیاتوي چې په دې وروستیو کې دکرنې وزارت د پرمختیایي برنامو او پروژو له لارې په دې ولایت کې د سبو او ترکاریو د تولیداتو زیاتوالي او د کرکېلي د نویو لارو چارو دودولو لپاره د ولایت په کچه ۸۴۲ لویې او وړې شنې خونې هم جوړې شوي دي.
