رویداد خبري آژانس په افغانستان کې لومړنۍ دیجټلي خبري آژانس
د عامې روغتیا وزارت مسوولان خبر ورکوي چې په افغانستان کې د تېر کال په پرتله سږ کال په ماشومانو کې د شري ناروغي زیاته شوې ده.
د یاد وزارت ویاند شرافت زمان امرخېل (یکشنبې، د لړم۱۳مه) ویلي، سږکال په ټول هېواد کې په ماشومانو کې د شري ناروغۍ شپږ زره مثبتې پېښې ثبت شوې دي.
هغه زیاتوي، دغه وزارت غواړي د راتلونکي میلادي کال په پیل کې د شري ناروغۍ د واکسين ملي کمپاین پلی کړي چې په کې به ۱۶ میلیونه له لس کلونو کم عمره ماشومان واکسین شي.
له دې څو ورځې وړاندې د روغتیا نړیوال سازمان هم په افغانستان د شري د ناروغۍ په زیاتېدو اندېښنه ښودلې وه او ویلي یې وو، چې اوسمهال په دغه هېواد کې د شري ټولې پېښې څه باندې ۵۲ زرو ته رسېږي.
دا په داسې حال ده چې ډاکتران وایي په ماشومانو کې زکام، ډېره تبه، د اشتها کمېدل او ټوخی د شري ناروغۍ نښې دي او کورنۍ کولای شي، د دې نښو په لیدلو سره خپل ماشومان د درملنې لپاره روغتیايي مرکزونو ته بوځي، څو د دغې ناروغۍ د لا پراخېدو مخه ونیول شي.
