رویداد خبري آژانس په افغانستان کې لومړنۍ دیجټلي خبري آژانس
د ملګرو ملتونو د بشري چارو د همغږۍ دفتر وايي، د ۲۰۲۴ کال له جنورۍ څخه د مې تر پایه شاوخوا ۵۹۵ زره افغان کډوال له ایران او پاکستان څخه افغانستان ته راستانه شوي دي.
د هغو معلوماتو له مخې چې د ملګرو ملتونو دغې ادارې نن (سه شنبه د چنګاښ ۱۲مه) خپور کړی، د روان کال په لومړیو پنځو میاشتو کې ۵۲۶،۸ زره افغان کډوال له ایران څخه راستانه شوي چې د تېر کال د همدې مودې په پرتله ۴۴ سلنه زیاتوالی ښيي.
اوچا ویلي چې له ایران څخه د راستنیدونکو افغانانو ۴۳ سلنه نارینه، ۱۴ سلنه یې ښځې او ۴۳ سلنه یې له ۱۸ کلونو کم عمره ماشومان دي.
په دې موده کې د ملګرو ملتونو د بشري چارو د همغږۍ دفتر له پاکستان څخه د۶۷زره او ۹۰۰ افغان کډوالو راستنېدل ثبت کړي چې د ۲۰۲۳ کال د لومړیو پنځو میاشتو په پرتله ۴۱ سلنه ډېر شوي دي.
له پاکستان څخه د راستنیدونکو په منځ کې، ۲۰٪ نارینه، ۲۶٪ ښځې، او ۵۴٪ د ۱۸ کلونو څخه کم عمر لرونکي ماشومان دي.
پاکستاني حکومت د ۲۰۲۳ کال په اکتوبر میاشت کې له دغه هېواده د قانوني اسنادو پرته د افغان کډوالو د ایستلو بهیر پیل کړ.
د ملګرو ملتونو د راپور له مخې دا مهال ۴.۵ میلیونه افغان کډوال په ایران کې او ۳.۲ میلیونه نور په پاکستان کې ژوند کوي.
