رویداد خبري آژانس په افغانستان کې لومړنۍ دیجټلي خبري آژانس
ولسمشر په هېواد کې د وروستیو راوتلو سیلابونو له ځپل شوو کورنیو سره د بېړنیو مرستو ژمنه کړې ده.
نوموړي پرون ناوخته د ویډیو کنفرانس له لارې د پروان ولایت له ځايي چارواکو او قومي مشرانو سره خبرې کړې دي او دوی ته یې ډاډ ورکړی دی چې ژر تر ژره به حکومت له دوی سره ټولې اړینې مرستې ترسره کړي.
نوموړي همدا راز د امرالله صالح په مشرۍ د پروان ولایت لپاره د مرستو یو کمیسیون جوړ کړی دی چې دوی به د ارګ د عملیاتي ادارې او مالیې وزارت په همغږۍ په پروان کې د ویجاړو شوو عامه تاسیساتو د جوړولو لپاره کار کوي.
ولسمشر غني همدا راز له ټولو امنیتي او دفاعي ځواکونو غوښتنه کړې چې د پروان له خلکو سره دې هر اړخیزه همکاري وکړي او د امنیت په تامین کې دې خپلې هڅې ډېرې کړي.
بلخوا معلومات ښيي چې د سیلابونو له امله په دغه ولایت کې تر ۱۰۰ پورې کسان مړه شوي دي او تېره شپه هم په دغه ولایت کې له خاورو د جسدونو د رایستلو عملیات روان وو.
