رویداد خبري آژانس په افغانستان کې لومړنۍ دیجټلي خبري آژانس
ملي دفاع وزارت خبر ورکوي چې د امنيتي او دفاعي ځواکونو د فارياب پښتونکوټ او قرهباغ دوې ولسوالۍ نن سېشنبه د (چنګاښ په ۸مه) له وسلهوالو طالبانو بېرته نيولي دي.
دې وزارت د يوې خبرپاڼې په خپرولو سره ويلي، افغان ځواکونو د نورو ولايتونو ترڅنګ په غزني او پروان کې هم د ولسواليو د بېرته نيولو جدي هڅې پيل کړې او زياتوي چې ژر به په يادو ولايتونو کې هم يو شمېر ولسوالۍ د وسلهوالو طالبانو له ولکې ازادې شي.
ځينو رسنيو ملي دفاع وزارت ته د نږدې سرچينو په حواله دا هم ويلي، چې په کندوز او تخار کې هم د امنيتي او دفاعي ځواکونو له لوري پرمختګ شوی او ګڼې ولسوالۍ به بېرته د دوی لاس ته پرېوځي.
وسلهوالو طالبانو په وروستيو کې پر جګړې خپل تمرکز زيات کړی او برعکس د سولې مذاکراتو په تړاو يې خپله دلچسپي کمه کړې ده. خو د ملي پخلاينې عالي شورا رئيس ډاکټر عبدالله عبدالله پرون دوشنبه د (چنګاښ په ۷مه) څرګنده کړه چې د سولې په اړه د مذاکراتو په موخه به د حکومت دروازه تل پرانيستې وي.
