رویداد خبري آژانس په افغانستان کې لومړنۍ دیجټلي خبري آژانس
د ا.ا د کانونو او پټرولیم وزارت وايي، د امو سیند په حوزه کې د ورځې د نفتو د استخراج کچه ۱۳۵۰ ټنو ته لوړه شوې ده.
دغه وزارت نن چهارشنبه د کب ٩مه په یوه خبرپاڼه کې ويلي چې د امو سيند د نفتو په حوزه کې شپږ نوي څاګانې کيندلې او فعالې شوې او په دې برخه کې د فعالو څاګانو شمېر ٢٤ څاګانو ته رسېدلی دی.
د کانونو او پټرولیم وزارت همداراز ویلي چې د روان کال تر پایه به د امو سیند د نفتو په حوزه کې ټولټال ۴۷ څاګانې فعالې شي او د نفتو د استخراج اندازه به درې زره ټنو ته لوړه شي.
د امو سیند د نفتو په حوزه کې سرپل، جوزجان او فاریاب ولایتونه شامل دي.
ا.ا تېر کال د نفتو د دې حوزې د استخراج تړون له يوه چينايي شرکت سره د ۲۵ کلونو لپاره لاسليک کړ.
