رویداد خبري آژانس په افغانستان کې لومړنۍ دیجټلي خبري آژانس
د ا.ا د بهرنیو چارو وزیر، امیرخان متقي ترکمنستان ته د سفر په ترڅ کې د وزیرانو د شورا مرستیال، باترامانوف سره په کتنه کې د ټاپي پروژې او افغانستان ته د ترکمنستان د ګازو د لېږد په اړه خبرې کړې دي.
د بهرنیو چارو وزارت ویاند، عبدالقهار بلخي په خپله اېکس پاڼه لیکلي، چې امیرخان متقي له امانوف سره په کتنه کې په افغانستان کې د ټاپي پروژې د چټک عملي کار په پيلېدلو ټينګار کړی او هیله یې ښودلې چې ډېر ژر به د ترکمنستان د ګاز د لومړي فاز کار چارې پیل او بشپړې شي.
د بهرنیو چارو وزارت سرپرست ویلي چې هرات ته د ټاپي پروژې په راتګ سره به دغه ولایت د ترکمنستان د ګازو لپاره ښه بازار شي.
په همدې حال کې د ترکمنستان د وزیرانو شورا مرستیال ویلي چې افغانستان ته د انرژۍ لېږد په ځانګړې توګه د ټاپي پروژې له لارې د دغه هېواد لومړیتوب دی.
ټاپي پروژه، چې د ترکمنستان ګاز د افغانستان له لارې پاکستان او هند ته لېږدوي، په ۲۰۱۴ کال کې د دغو څلورو هېوادونو د مشرانو له خوا پرانیستل شوه.
