رویداد خبري آژانس په افغانستان کې لومړنۍ دیجټلي خبري آژانس
د امریکا ولسمشر، جو بایډن د راتلوونکو ولسمشریزو ټاکنو کې له خپلې نوماندۍ تېر او خپله لومړۍ مرستیاله کاملا هاریس یې د ځان پر ځای ټاکنو ته وړاندیز او ملاتړ یې ترې اعلان کړی دی.
هغه پرون (یکشنبې، د چنګاښ ۳۱مه) پر خپله اېکس پاڼه لیکلي چې د امریکا د بیا ځلي ولسمشر په توګه یې د ټاکل کېدو هوډ درلود، خو اوس په دې باور دی چې دا پرېکړه به یې د ډیموکراټ ګوند په ګټه وي.
بایډن زیاته کړې چې د ډیموکراټ ګوند او خپل ملت د یووالي او همدارنګه د ډونالډ ټرمپ ناکامۍ ته هڅه کوي.
نوموړی داسې مهال له خپل نوماندۍ تېر شوی چې هغه د ډیموکرات ګوند د غړو تر سخت فشار لاندې و، ځکه چې په وروستیو اوونیو کې د ډونالډ ټرمپ سره په لومړۍ مناظره کې کمزوری وبرېښېد.
که چېرې ۵۹ کلنه هاریس د ډیموکراټ ګوند له خوا د سږ کال ټاکنو ته معرفي شي، نو دا به د امریکا په تاریخ کې لومړنۍ تور پوستې ښځه وي چې د ولسمشرۍ ټاکنو ته درېږي.
بلخوا د امریکا پخواني ولسمشر بارک اوباما د جو بایډن له یادې پرېکړې هرکلی کړی دی.
اوباما دغه راز اندېښنه ښودلې که ټرمپ بیا ځلې ولسمشر شي، نو امریکا او ډیموکراټانو ته به ناوړه پایلې ولري.
