رویداد خبري آژانس په افغانستان کې لومړنۍ دیجټلي خبري آژانس
د روغتيا نړيوال سازمان په ۱۹۴۸ کال کې تاسیس شو او وروسته له هغې ورځې تر نن د روغتیا نړيوالې ورځې په نوم ونومول شوه، چې هدف یې په نړۍ کې د روغتیا د پراختیا لپاره د پام وړ هڅې او د مهمو روغتیایي ستونزو په اړه عامه پوهاوی زیاتول دي. دغه ورځ د روغتیا په برخه کې د نړیوالو همکاريو او هڅو د ترویج لپاره مهمه پیښه ګڼل کیږي.
د ملګرو ملتونو پراختیایي پروګرام (UNDP) د دې ورځې په مناسبت پر خپلې اېکس پاڼه لیکلي چې په افغانستان کې د ساینسپوهانو، روغتیايي کارکوونکو او په دې برخه کې د ټولنو هڅې ستایي. دوی وايي چې دغه هڅې د خلکو ژوند ژغوري او په سختو شرایطو کې هم د هغوی د روغتیا ساتنه کوي.
د ملګرو ملتونو پراختيايي پروګرام همداراز ويلي چې په افغانستان کې د پراختیايي پروګرامونو د تطبیق له لارې په دې وروستیو کې د روغتیايي نظام ځینې برخې پیاوړي شوې دي.
د UNDP په وینا، د ګلوبل فنډ په ملاتړ په ټول هېواد کې د اېچآی وي، نري رنځ او ملاریا د درملنې خدمات وړاندې کېږي. همداراز، د روغتیايي سیسټمونو پیاوړتیا لپاره هم هڅې روانې دي، چې موخه یې د ټولنې تر ټولو زیانمنو کسانو ته روغتیايي خدمتونه وړاندې کول دي او دې فعالیتونو د افغانستان په مختلفو سیمو کې د روغتیا وضعیت په ښه والي کې مرسته کړې.
