رویداد خبري آژانس په افغانستان کې لومړنۍ دیجټلي خبري آژانس
د امريکا بهرنيو چارو وزارت اعلان کړی چې د يوې تازه پرېکړې له مخې يې د اوکراين له پلازمېنې کيف څخه خپل سفارت د دغه هېواد لوېديځ ولايت (لويو) ولايت ته لېږدولی دی.
د امريکا بهرنيو چارو وزير انټوني بلېنکن د يادې پرېکړې د اعلان پرمهال ويلي، دا پرېکړه له اوکراين سره پر پوله د روسي ځواکونو د ځای پر ځای کېدو او دغه راز پر اوکراين د روسيې د بريد احتمال زياتېدو له کبله شوې ده.
نوموړي زياته کړې چې د امريکا سفارت به د اوکراين له دولت سره په اړيکه کې وي؛ خو په خبره يې خپلې چارې به د لنډمهال لپاره له لويو پر مخ وړي.
له دې وړاندې داسې راپورونه ورکړل شوي وو چې يو شمېر لوېديځ هېوادونه غواړي په کيف کې خپل سفارتونه وتړي او پر ځای د اوکراين لپاره له کوم بل هېواد سياسي ماموريت پر مخ يووسي؛ خو د اوکراين ولسمشر ولاديمير زيلينسکي ورته پلان نيونه لويه تېرتنه ګڼلې وه.
