رویداد خبري آژانس په افغانستان کې لومړنۍ دیجټلي خبري آژانس
د رویټرز د راپور له مخې، د سعودي عربستان د انرژۍ وزارت ویلي چې د سېشنبې په ورځ د دغه هېواد په جنوبي سیمو کې د یمن د ایرانپلوه حوثیانو له بریدونو وروسته د انرژۍ د ځینو تاسیساتو فعالیتونه په موقتي ډول درول شوي دي.
د وزارت په وینا، په یادو بریدونو کې د انرژۍ پر تاسیساتو اورونه لګېدلي او د زیانونو د ارزونې چارې روانې دي.
د سعودي په مشرۍ ائتلاف ویلي، چې په بریدونو کې لږ تر لږه ۷۳ کسان، چې ښځې او ماشومان هم پکې شامل دي، ټپیان شوي دي. د ائتلاف ویاند تورن جنرال ترکي المالکي ویلي، بریدونه د ابها، خمیس مشیط، جازان او نجران ښارونو ملکي او اقتصادي تاسیسات په نښه کړي دي. نوموړي دغه بریدونه «خطرناک تشدید» بللي او ویلي یې دي چې ائتلاف به د حوثیانو پر وړاندې د مخنیوي او ځواب لپاره لازم عملیاتي اقدامات ترسره کړي.
