رویداد خبري آژانس په افغانستان کې لومړنۍ دیجټلي خبري آژانس
پنټاګون يا د امريکا دفاع وزارت په يوه تازه راپور کې، چې پرون سېشنبه د (تلې په ۵مه) يې خپور کړی اعتراف کړی، چې په ۲۰۲۱ زېږديز کال کې د تخليې عملياتو پرمهال په کابل کې د بېپیلوټه الوتکې بريد له امله ۱۰ تنه ملکي افغانان وژل شوي دي.
دې وزارت په خپل راپور کې زياته کړې، د امريکا دولت تر دې مهال د ياد هوايي بريد قربانيانو کورنۍ ته هېڅ غرامت نه دی ورکړی.
په راپور کې ويل شوي، چې دا بريد له افغانستان څخه د امريکايي ځواکونو له وتلو يوه ورځ وړاندې د ۲۰۲۱زېږديز کال د اګسټ په ۲۹مه شوی دی او په ترڅ کې يې ۱۰تنه ملکي افغانان وژل شوي دي.
د راپور له مخې، د وژل شوو ۱۰ تنو ملکيانو له ډلې ۷ هغه يې ماشومان وو.
په راپور کې ځينې نورو هوايي بريدونو ته چې پر ملکي افغانانو ترسره شوي هم اشاره شوې ده. د پنټاګون د راپور له مخې، د ۲۰۲۱ کال د جنوري په ۸مه يو ملکي وکړی په هرات او د همدې کال د اګسټ په ۱۱مه په کندهار کې هم يو تن د بېپيلوټه الوتکې په بريد کې وژل شوی. د ۲۰۲۱ کال په جنوري کې هم د يوه جلا هوايي بريد پرمهال په کندهار کې ۲تنه ټپيان شوي وو.
پنټاګون د اګسټ په ۲۹مه په کابل کې هوايي بريد غموونکی بللی او ويلي يې دي، چې دا بريد د داعش ډلې د جنګياليو د سوارلۍ موټر په نښه کولو لپاره پلان شوی و؛ خو پنټاګون بيا هم ټينګار کړی، چې پوځيانو يې د دې بريد په ترسره کولو سره هېڅ قانون نه دی مات کړی.
له دې وړاندې د امريکا دفاع وزارت اعلان کړی و، چې په کابل کې د ياد بريد قربانيانو کورنيو ته غرامت ورکوي، خو اوس يې خپله اعتراف کړی چې تر دې مهال يادو کورنيو ته غرامت نه دی ورکړل شوی.
