خبرگزاری رویداد اولین خبرگزاری دیجیتلی در افغانستان
مقام‌های شرکت دولتی برق تاجیکستان اعلام کرده‌اند که در سال ۲۰۲۴، صادرات برق به افغانستان را ۱۷ درصد افزایش می‌دهند.
مقام‌های شرکت دولتی برق تاجیکستان روز چهارشنبه، ۲۵ دلو به رسانه‌های این کشور گفته‌اند که دوشنبه مایل است تا میزان صادرات برق به افغانستان را در سال ۲۰۲۴، هفده درصد افزایش دهد.
محمد عمر آسوزاده، رییس شرکت دولتی برق تاجیکستان گفته است که با وجودیکه تاجیکستان با کمبود برق در داخل این کشور مواجه است اما در تلاش‌اند تا میزان صادرات برق به افغانستان را در سال جاری میلادی افزایش دهند.
آقای آسوزاده همچنان گفته است که در سال ۲۰۲۳، تاجیکستان 1.6 میلیارد کیلووات ساعت برق به کشور افغانستان صادر کرده است.
گفتنی است که افغانستان از جمله کشورهای است که متکی به برق وارداتی از کشورهای همسایۀ خود است.
براساس آمار شرکت برق‌رسانی برشنا، افغانستان در حال حاضر، حدود ۱۴۰۰ میگاوات برق نیاز دارد که ۷۰ درصد آن را از ازبیکستان، ترکمنستان، تاجیکستان و ایران وارد کرده و ۳۰ درصد دیگر از منابع داخلی تامین می‌شود.
