رویداد خبري آژانس په افغانستان کې لومړنۍ دیجټلي خبري آژانس
امریکا وایي د میلیاردونو ډالر په ارزښت یې نظامي توکي له افغانستان ایستلي دي.
د امریکا ددفاع وزارت دوو لوړپوړو چارواکو ددغه هېواد سنا ته د وینا پر مهال ویلي چې د سرتېرو د ایستلو چاره یې شل سلنه بشپړه شوې ده.
د دوی په خبره له افغانستان یې په ګڼو پروازونو کې د سرتېرو تر څنګ نظامي تجهیزات هم را ایستلي دي او دوی بریالي شوي چې له دغه هېواد د ۳۸ میلیارده ډالرو په ارزښت نظامي تجهیزات بېرته امریکا ته ولېږدوي.
دغه لوړپوړو چارواکو همدا راز ټینګار کړی چې د سرتېرو تر وتلو وروسته به یې هم له افغانستان سره خپلې ژمنې پر ځای وي.
دوی وایي چې په دغه هېواد کې د امنیت پر وړاندې تر ټولو ستر خنډ د نشه يي توکو کاروبار دی چې باید له منځه یوړل شي.
